Oath Taking 2019, Nangin Madinarag-un

Ang mga nagdaraug kang nagligad nga eleksyon ang opisyal ron nga nagsumpa sa atubang ni Judge Francisco S. Guzman, Executive Judge kang Regional Trial Court Branch 12 nga ginhiwat sa sulod mismo kang simbahan kang Romano Katoliko pagkatapos kang sangka misa nga ginpangunahan ni Rev. Fr. Hadjie Jungco, kaimaw man sanday Fr. Martin Laurio kag Fr. Sonny Esparar.

Pagkatapos kang 'Oath Taking' nagtugro kang sangka mensahe ang nagdaug nga Vice Mayor kang Banwa kang Bugasong sa persona ni Hon. Engr. Renante Salcedo Dava kon sa diin, tana ang nagpasalamat kay Judge Guzman sa pag-'officiate' kang pagsumpa sa katungdanan ni Mayor John Lloyd M. Pacete kang adlaw antes ang Oath Taking Ceremony para sa mga Sangguniang Bayan Members kag Vice Mayor kang Banwa kang Bugasong.

Sa ana nga mensahe, tana ang nagpasalamat sa Mahal nga Dios kag sa katawhan kang Bugasong kay sa likod kang kubus nga istorya kang ana kabuhi bilang sangka bata kang manugbaligya asin kag ginamus, tana ang gintugruan kang oportunidad nga magserbe bilang ikarwa nga tatay ka banwa kang Bugasong.

Ang mensahe ni Hon. Dava ang ginsundan kang sangka espesyal nga numero ni Smile Obsina Jungco, kon sa diin ang amo nga numero ang ginhimo nga basehan ni Judge Guzman sa ana Inspirational Message.

Si Judge Guzman ang nagkuon nga sa kabuhayon kang ana pagserbisyo bilang hukom, amo pa lang dya ang higayon nga nag-'administer' tana kang pagsumpa kang mga opisyales sa sulod mismo kang simbahan. Tana ang nagdayaw kang lihok ka banwa kang Bugasong nga sa simbahan ginhiwat ang pagsumpa kag tana ang nagahingyo gid sa mga opisyales nga himuon nga sentro kang anda pagserbisyo sa banwa ang kabuhi ni Kristo kag ang pagturun-an kang simbahan.

Sa ana pagpadayon, tana ang nagsugid sa mga nagtarambong kon andut nga ginaangut na ang simbahan sa ana mensahe sa rason nga tana gali kadya kauna sangka 'ex-seminarian' nga nag padayon pasimpalad sa patag kang abogasya kag hudikatura.

Lantawa ang bilog nga mga nagkaratabo sa Oath-Taking 2019 kag pamatian ang mga mensahe nanday Vice Mayor Renante S. Dava kag Judge Francisco S. Guzman.

Other posts

• Community Fish Landing Center sa Brgy. Jinalinan, Padayon nga Ginaobra
• Sa Kada Takmu, Gugma
• Biktima kang Landslide, Nakabaton Suporta-Pinansyal
• Biktima kang Buhawi sa Sitio Villasis, Nakabaton kang Bulig Pinansyal
• Agosto 12, Gindeklarar kang Presidente nga Regular Holiday
• Panay FM Radio Stations
• Smoke-Free Task Force naghinun-anun para sa sangka Smoke-Free Bugasong
• VIRAL! Maestro, Ginsorpresa kang ana mga Estudyante.
• Mga Supporters ni Mayor John Lloyd Pacete, Nag-Prayer Rally
• Kasadyahan sa Tindahan