Mga Bag-o nga Opisyales sa Banwa kang Bugasong, Nagsumpa.

Ang mga kandidato nga nagdaraug kang nagligad nga National kag Local Elections sa banwa kang Bugasong ang nagsumpa sa anda obligasyon bilang mga opisyales kang banwa.

Ang mga opisyales ang nagtambong anay sa sangka misa nga ginhiwat sa simbahan sa parokya ni Sr. Sto. Niño nga ginpangunahan ni Rev. Fr. Hadjie Jungco, kaimaw man sanday Fr. Martin Laurio kag Fr. Sonny Esparar.

Pagkatapos kang santos nga misa, nagsunod ang programa sa pagsumpa kang mga opisyales sa anda obligasyon sa sulod mismo kang simbahan nga may pagpahanugot halin sa team ministry base man sa pangabay kang lokal nga pamunuan kang LGU Bugasong tungod sa ginaturok nga malain nga panahon nga dara kang bagyo nga si Dodong.

Ang nahauna nga parte kang programa amo ang pagsulod kang mga opisyales paagto sa tunga kon sa diin tanda ang magatigayon kang pagsumpa sa anda nga obligasyon kag duro ka mga katawhan ang nagahawat-hawat ang anda paginhawa nga makita ang presensya ni Hon. John Lloyd M. Pacete kag ang iba nagturo ang luha kang natapos ron lang ang pagsulod ka mga pulitiko pero wara gid nanda makita si Mayor Pacete. (May angut nga isyu sa idalum)

Ang una nga grupo kang mga nagsumpa sa atubang ni Judge Francisco S. Guzman, Executive Judge kang Regional Trial Court Branch 12, San Jose, Antique amo sanday Hon. Casimira S. dela Cruz, Hon. Susan V. Escote, Hon. Edsel James A. Capendit kag Hon. Jennifer Rose A. Tatoy kag ginsundan kang ikarwa ka grupo nga ginakatapuan nanday Hon. Roberto V. Fruto, Jr., Hon. Manuel S. dela Cruz, Jr., Hon. Lea Agnes V. Pediangco kag Hon. Breccio M. Ostan, Jr.

Pagkatapos kang pagsumpa kang mga katapo kang Sangguniang Bayan kang Bugasong amo ang pagsumpa ni Hon. Renante S. Dava, nga ginpatigayon man gihapon ni Judge Guzman kang RTC Branch 12.

MGA ANGUT NGA ISYU

Sa pihak nga bahin, si Hon. John Lloyd M. Pacete ang wara makatigayon nga magtambong sa nasambitan nga okasyon bangud sige pa sa gihapon ang pagproseso kang mga papeles para sa ana temporaryo nga kahilwayan.

Pero suno sa mensahe ni Hon. Renante S. Dava, pagkatapos nga tana ang nagsumpa, si Hon. John Lloyd M. Pacete ang nakatigayon nga magsumpa sa atubang ni Judge Francisco S. Guzman kang petsa 27 kang Hunyo kadya nga tuig sa opisina kang nasambitan nga hukom kag dya ang ginkumpirmar mismo ni Judge Guzman sa ana man nga 'inspirational message' nga ginpalab-ot sa mga nagtarambong sa okasyon.

Ang adlaw nga gintalana kang grupo kang #fortheloveofbugasong nga petsa 28 kang Hunyo nga adlaw kang 'oath taking 2019' amo man ang adlaw nga kon sa diin nagahiwat kang ana kaadlawan ang asawa ni Hon. John Lloyd M. Pacete nga si Dr. Thea Belle M. Pacete.

(Full pictures taken during the event will be uploaded at Bugasong Online FB Page)

 

---

Other posts

• Community Fish Landing Center sa Brgy. Jinalinan, Padayon nga Ginaobra
• Sa Kada Takmu, Gugma
• Biktima kang Landslide, Nakabaton Suporta-Pinansyal
• Biktima kang Buhawi sa Sitio Villasis, Nakabaton kang Bulig Pinansyal
• Agosto 12, Gindeklarar kang Presidente nga Regular Holiday
• Panay FM Radio Stations
• Smoke-Free Task Force naghinun-anun para sa sangka Smoke-Free Bugasong
• VIRAL! Maestro, Ginsorpresa kang ana mga Estudyante.
• Mga Supporters ni Mayor John Lloyd Pacete, Nag-Prayer Rally
• Kasadyahan sa Tindahan